Romans 10

Israelre olemi mire nge sovengalo ako aro o velpol ini toko vengvenga a God itheki, kene avele.

1Na titeikre, tho sis rintet ve aro God aro i pamimi Israelre, na tho nong nge a God venen aken. 2Eneke tho pavurvur ako aro tho pamilempot nunganga ve, o engeng nge a God ipanesnga, aveto olo vur polpol, eneke olemi nine senu nge ur ako God i sis ve aro oma i, kene avele. 3Na olemi mire senu avele ako, ini inga a God ienga ako i oma toko mo i velpol ini toko vengvenga a itheki. Ma o sis ve aro o velpol ini toko vengvengare a God itheki, ako nge osivenga ole engenging. Na olemi i venen aken, mako o lel okime nge a God ile sovengalo ako aro i apet toko ve ini toko vengvenga nge. 4Na o leklek venen aken, eneke Krais i tepolal a Moses ile patorong mei lale, mako toko alavusnga ako olemio nge a Krais, kene God i apet or ini toko vengvengare a itheki.

5Na i venen aken, eneke Moses i ritet nge patorong panesnga a sovengalo, ako aro God i apet toko ve ini toko vengvenga nge, na i ri vene:

“Toko e ako i avsa a Moses ile patorong e avele,
aro i el mimiong ako aro ile vusonga avele
ako nge ile vothung aken.”
Wok Pris 18:5

6Na aken i klipalaltun, aveto aro ve God i apet it ini toko vengvenga ako nge ler lemioong inga, aken i semel na te nutuno nge riong ako i voth a God ile erere nge, ako i ri vene:

“Mothong tova lomum ve,
‘E avele i pavurvur ako aro i esa roro a Pen a Urvet.’”
Lo 30:12

(Aken i mirenga ve, i oma venen aken mo i elu a Krais nge me.) Na God ile erere i ri mun ve,

7“Na mothong tova lomum mun ve,
‘E avele i pavurvur ako aro i esu ruru a Wali.’”
Lo 30:13

(Aken i mirenga ve, i oma venen aken mo i ela werer a Krais a rinong a pen nge me.) 8Na mothong tova lomum venen aken, eneke Krais ile riong i voth mela venen aken avele, aveto God ile riong i ri vene:

“God ile riong i semel nge elnga.
I pavurvur ako aro ong ri nge
na i pavurvur ako aro lomum rum nge.”
Lo 30:14

Riong ako i ri ve, “God ile riong” i ri nge ile riong ako i ritet nge lemioong a sovengalo. Na riong aken ini ur ako them panongpol nge. 9Na lemem panongpolong i vene: Aro ve ong ri patpot ve, “Jisas ini Toko Pomnga” na aro ve lomumo ako a opom lemi ve, God i palos werera i nge rinong, na nge aken God aro i pamimi ong. 10Na riong aken i nunganga, eneke lemiro nge a Jisas ake a opor lemi, na nge aken God i pavurvur ako aro i apet it ini toko vengvengare, na e mun e, aro ve te ri patpot ler lemioong aken nge wor, na nge aken God aro i pamimi it. 11Na i ranga ve ako God ile erere i ri nge ako i ri vene:

“Neneanga kathnga ako ve, ilemio nge i,
aro i el le maraing nge i avele.”
Aisaia 28:16

12Na riong aken i ri nge toko neneanga e kene i nunganga, eneke Judare tomo mun nge areko or ini Judare avele, kene o vur e pel inga a God itheki. Na Toko Pomnga ini toko alavusnga ake ru a ulue oa Pomnga. Na i kene i oma senu nge toko na seng alavusnga ako o nong a i nge. 13Na riong aken i nunganga, eneke God ile erere i ri vene:

“Toko na seng alavusnga
ako o avav a Toko Pomnga
mo i pamimi or,
aro i oma venen aken
a or nge.”
Joel 2:32

14Na riong aken i nunganga, aveto aro ve olemio nge a Toko Pomnga avele, aro o avav a i nge vava, e? Na aro ve o nongpol riong pelie nge i avele, aro olemio nge i vava, e? Na aro ve toko e i panongpol or nge i avele, aro o nongpol riong pelie nge i vava, e? 15Na aro ve o pake panongpolonga e a or nge avele, aro i panongpol or nge i vava, e? Na i ranga ve ako God ile erere i ri nge ako i ri vene:

“Panongpolong Sivenga panongpolngare
ole velpoling a tokokoere nge
kene i sivenga rintet.”
Aisaia 52:7

16Na Panongpolong Sivenga nge a Jisas i velpol a Israelre nge, aveto pelie a or nge kene o nongal nge avele. Na i ranga ve ako God ile riong elnga a Aisaia i ri nge ako i ri vene:

“Toko Pomnga,
them panongpol nge lom riong,
aveto anga e i nongal nge?”
Aisaia 53:1

17Na i venen aken, make lemir mire ako ve, tokokoere aro o nongpol tel panongpolong nge a Krais, lamo o pavurvur ako aro olemio nge i, na o nongpol panongpolong aken, tova toko e i panongpol or nge. 18Na toko Israel alavusnga o nongal nge panongpolong aken avele. Na i vava, e? O nongpol i avele, e? Avele, o nongpol i lale, eneke God ile erere i ri vene:

“Tokokoere a pen elonga ake ru a ulue
o nongpol okei lale.
Na ole riongre i velpol
a rumrem elonga
ake ru a ulue lale.”
Buk Song 19:4

19Na i vava mun, e? Ava lomumu ve, Israelre olemi mire senu nge panongpolong aken mirenga avele, e? Avele ako, olemi mire nge, eneke Moses i ritet tel nge a mukaling ako olemi mire nge a God ile riong, na i watu a God ile riong vene:

“Aro tho pavurpol lomumu
mo i ngo kerere,
nge ako tho oma lek omaing sivenga
a toko rerelire nge.
Aro tho palemi kling thomu,
nge ako tho oma lek omaing sivenga
a tokokoere nge
ako thomu o rivenga olemi mire nge tho avele.”
Lo 32:21

20Na Aisaia i ri nge toko rerelire, ave i ngeip avele nge ako i watu a God ile riong vene:

“Areko olemi mire nge kathngek avele,
o sangpolo tho lale.
Na tho patheng patpot sivengek
nge areko o nintet nge tho avele.”
Aisaia 65:1

Aveto Aisaia i ri nge Israelre na i watu a God ile riong vene:

“Nge nang elonga tho theal rangal
nge thomu telnga plaongare
na riong avsangare
mo ako o lo werer a tho nge me,
aveto avele.”
21Aisaia 65:2